Fframwaith strategol ar gyfer addysg cyfrwng Cymraeg
a dwyieithog
Mae Llywodraeth Cynulliad Cymru wedi gosod targed ar gyfer cynyddu cofrestriadau cyfrwng Cymraeg mewn addysg uwch:
- canran y myfyrwyr sy’n byw yng Nghymru, sydd yn SAU Cymru ac sy’n dilyn rhyw elfen o’u cyrsiau trwy gyfrwng y Gymraeg, am gynyddu i 7% erbyn 2010
Yn 2003 sefydlodd CCAUC Grŵp Llywio Darpariaeth Cyfrwng Cymraeg i ddatblygu strategaeth gychwynnol yng ngoleuni dyheadau Llywodraeth Cynulliad Cymru. Daeth yr aelodau o’r sector addysg uwch a chyrff eraill sydd â diddordeb mewn addysg uwch cyfrwng Cymraeg.
Cafodd strategaeth y Grŵp Llywio ei chyflwyno i Lywodraeth Cynulliad Cymru ym mis Hydref 2004. Cymeradwyodd Llywodraeth y Cynulliad ddyraniadau o Gronfa Ailgyflunio a Chydweithio CCAUC er mwyn dechrau gweithredu’r strategaeth.
Fel rhan o’r strategaeth, ymgymerodd Arad Consulting Cyf ag astudiaeth annibynnol ar ran y sector o’r modelau posibl ar gyfer cyflwyno darpariaeth cyfrwng Cymraeg yn y dyfodol. Awgrymodd model rhwydwaith, wedi’i gefnogi gan fframwaith strategol cenedlaethol.
Yn ystod 2006/07, bu CCAUC yn gweithio’n agos â’r sector i ystyried sut i ddatblygu a chyflwyno darpariaeth cyfrwng Cymraeg yn y dyfodol. Cytunodd y sefydliadau addysg uwch, drwy eu corff cynrychiadol, Addysg Uwch Cymru (AUC), i sefydlu fframwaith strategol a chynllun datblygu cenedlaethol newydd ar gyfer darpariaeth cyfrwng Cymraeg.
Mae’r fframwaith yn cael ei harwain gan Grŵp Sector Addysg Uwch Cyfrwng Cymraeg sy’n cynnwys cynrychiolwyr ar y lefel uwch o bob un sefydliad AU. Cefnogir y Grŵp Sector gan grŵp cydlynu o swyddogion sefydliadol ac is-grwpiau sy’n cymryd cyfrifoldeb dros feysydd manwl penodol, yn ogystal â phaneli rhwydwaith sy’n gyfrifol am ystod o bynciau.
Mae’r Cynllun Datblygu Cenedlaethol yn delio â phob agwedd sydd yn dylanwadu ar y cyflenwad a’r galw ar gyfer darpariaeth cyfrwng Cymraeg, gan gynnwys datblygu darpariaeth newydd, cynyddu capasiti staffio drwy gynlluniau ysgoloriaethau a chymrodoriaethau, datblygu staff a marchnata.
Mae’r Ganolfan Addysg Uwch Cyfrwng Cymraeg yn darparu cymorth a chydgysylltu ar ran y Grŵp Sector ar gyfer y rhaglenni a’r gweithgareddau yn y Cynllun Datblygu Cenedlaethol.
Mae CCAUC yn parhau i weithio’n agos â’r Grŵp Sector, sefydliadau unigol, y Ganolfan Addysg Uwch Cyfrwng Cymraeg a Llywodraeth Cynulliad Cymru i ddatblygu darpariaeth addysg uwch cyfrwng Cymraeg.
